De Jesus Christ, et de sa doctrine.Dans le cabinet, ou nous ouismes Socrate la premiere fois, il y avoit un tableau de la nativite de nostre seigneur, qui luy donna lieu de nous faire ce discours.Il seroit difficile de regarder une si saincte peinture, sans estre surpris de quelque pensee de piete. Mais faisons davantage en cette surprise ; rendons-nous volontairement et de bonne foy, a la pensee qui nous a surpris : suivons-la, quand elle nous meneroit plus loin que nous n'avions resolu d'aller aujourd'huy.Une estable, une creche, un boeuf et un asne. Quel palais, bon Dieu, et quel equipage ! Cela ne s'appelle pas naistre dans la pourpre, et il n'y a rien icy qui sente la grandeur de l'empire de Constantinople. Ces princes qu'on nommoit porphyrogenetes  ; celuy qui fut roy avant que d'estre homme, le ventre de la reine sa mere ayant este couronne par les suffrages des ordres de son royaume ; les Ptolomees, les Alexandres et les Cesars faisoient bien plus de bruit, en venant au monde. De l'autre coste, il y a eu des princes, qui ont este exposez ; il y a eu des conquerans qui ont este nourris et eslevez par des bestes. Il y a une force retenue et dissimulee : la vertu est quelquefois en repos : la grandeur est quelquefois a l'estroit : la pompe n'accompagne pas tousjours la puissance.